今日小編同大家介紹自己嘅第一對高筒波boot，原價要成港紙$2299，媽，真係好貴呀！但係又咁靚好想買添！小編就當然好純熟咁去nike outlet碰下運氣啦！又真係咁好彩俾小編遇到，佢有兩款啱我腳嘅，一對係白色聖誕系列，一對就係黑色搭黃藍pattern，都只不過係$1379。雖然的確係偏貴，但係對鞋咁靚，又咁多技術型球星著，好啦，喱個月食飯慳啲都要整對試吓，就係咁我買咗黑色嘅呢對。
Nike Magista Obra，2014推出，magista系列嘅最貴版，著嘅有普巴，葛斯，大衛雷斯同馬杜迪等球星。Magista系列嘅其他版本為Magista Opus, Orden同 Ola，次序以價錢高至低排列。Magista主打嘅係Ball Control，為中場傳送型球員而設，而球鞋所應用嘅科技都係圍繞住呢樣野。
Magista Obra設計目標為赤足踢波嘅感覺，所以著落去好似著住對襪咁，包到貼一貼，以小編更相信對鞋係可以唔綁鞋帶咁踢波，只不過綁咗好似再固定啲咁。
Obra外層用上Nikeskin，Nike將呢個科技同樣放晌hypervenom貴版到，Nikeskin係一塊高科技合成皮，由纖維交織而成，透氣柔軟，外層仲有一塊薄薄的膜，目標都係令球員有種赤足控球的感覺。Obra當然同其他貴版鞋一樣，擁有All condition control (ACC)啦，啫係落雨踢波都唔會影響咁話！
Obra另一特別之處就當然係個高筒啦，高筒嘅感覺又係好似對襪咁，Nike稱佢為FlyKnit，佢由一層層嘅纖維組成，俾球員有種舒適，彈性同保護足踝嘅感覺。
Obra嘅鞋踭係值得留意嘅地方，佢同一般嘅鞋幾唔同下，踭位舊保護膠係中間凹咗落去，而凹咗個位係用塊厚嘅合成皮封住，目的同球鞋設計一致，包腳貼腳，著襪咁樣，赤足感覺。
釘底方面佢用上同hypervenom一樣嘅短細圓釘，目的係方便球員做轉向，唔會有種俾釘卡住卡住嘅感覺，
小編就著過對boot踢過陣，obra俾普通鞋細半碼。啫係我平時著開US8就要著US8.5。傳波控波感覺良好，係有種無著鞋嘅感覺，成對鞋由一塊皮組成，傳控球做得好自然。射波方便因為鞋面貼腳，只要食得應個波，個波就會去得好順，不過小編晌射波方面就要適應高筒，因為用腳面射波嘅時候會有種唔係好自然嘅感覺，好似射得無咁順咁。另外一方面，obra嘅鞋踭係小編最擔心嘅地方，佢塊保護膠係向下凹，萬一俾人踢到個踭就真係GG, 小編比較過幾款貴版鞋，obra塊保護膠係最低的，所以愛保護嘅朋友就要留意喇。
温馨提示: 如果金錢上負擔到，記得踢真草就著FG釘底，踢仿草就著AG釘底，無論球感同球鞋壽命都會好好多。此外，如果買仿草鞋記得買淺色啲嘅。小編就試過著住對黑色obra烈日當空踢仿草場，唔洗兩個字對腳已經超級熱，仲有種想起水泡嘅感覺，始終黑色吸熱再加上高筒更加難散熱，好彩小編果日有帶多對淺色嘅釘boot，唔係就要坐冷板坐成兩個鐘！
Search